Azərbaycanın Ümumdünya Ticarət Təşkilatına (ÜTT) üzv olması və qanunvericiliyin sözügedən təşkilatın tələblərinə uyğunlaşdırılması ilə əlaqədar bu ilin mart-aprel aylarında ÜTT-nin Gömrük Qiymətləndirilməsi Sazişi üzrə “Təlimçilərin təlimi” adlı treninq keçirilmişdir. Tədbir ABŞ Beynəlxalq İnkişaf Agentliyinin Azərbaycanda Ticarət və İnvestisiya İslahatlarına Dəstək Proqramı çərçivəsində Dövlət Gömrük Komitəsi və İqtisadi İnkişaf Nazirliyinin əməkdaşları üçün təşkil olunmuşdur.
Təlimi ABŞ-ın gömrük orqanlarında yüksək vəzifələrdə çalışmış, bir çox ölkələrin qanunvericiliyinin ÜTT-nin tələblərinə uyğunlaşdırılması prosesində fəal iştirak etmiş və gömrük sahəsində 50 illik təcrübəyə malik beynəlxalq ekspert Ben İrvin aparmışdır. Məqsəd ÜTT-nin qiymətləndirmə prinsipləri və bu sahənin xüsusiyyətləri haqqında, eləcə də Sazişin tətbiqi sahəsində dünya təcrübəsi ilə iştirakçıları məlumatlandırmaq, onları Azərbaycanda qiymətləndirmə sahəsində yeni nəsil mütəxəssislərin hazırlanmasına dair geniş biliklərlə təmin etmək və bu sahədə çalışan peşəkar yerli mütəxəssislərlə təcrübə mübadiləsi aparmaq olmuşdur. Davamı...

Aprelin 5-də Ümumdünya Gömrük Təşkilatının Bakıdakı Regional Tədris Mərkəzində «BYD kitabçalarından istifadə etməklə beynəlxalq yük daşımaları barədə Gömrük Konvensiyasının (BYD Konvensiyası 1975) tətbiqi» mövzusunda seminar keçirilmişdir.
Seminarı giriş sözü ilə açan Dövlət Gömrük Komitəsi Gömrük Nəzarətinin Təşkili Baş İdarəsinin rəis müavini, gömrük xidməti polkovniki Rauf Məmmədov BYD kitabçası tətbiq edilməklə beynəlxalq yük daşımaları barədə Gömrük Konvensiyasına dəyişikliklər barədə ətraflı məlumat vermişdir.
Beynəlxalq yük daşımalarının xüsusi statusa malik olduğunu bildirən R.Məmmədov bu tip daşımalarda gömrük əməkdaşlarının Konvensiyanın müddəalarına daha diqqətlə əməl etməsinin vacibliyini bildirmişdir.
Sonra seminarda BYD kitabçalarının rəsmiləşdirilməsi qaydaları, zəmanət birliyinin onun TİR sistemi ilə bağlı əsas funksiyaları və tətbiqi təcrübəsi, BYD kitabçalarından istifadə etməklə beynəlxalq yük daşımaları zamanı gömrük qaydalarının pozulması halları, ilkin hərəkətlər və bu kimi hüquqpozmalar haqqında işlər üzrə icraatın aparılması qaydaları, gömrük möhürləri və plombları ilə yüklərin daşınmasına «Buraxılış» haqqında şəhadətnamənin verilməsi qaydaları, BYD əməliyyatlarının başa çatması barədə gömrük məlumatlarının «BYD Qutusu» Proqramı vasitəsilə daxil edilməsi, ötürülməsi və «BYD GİPS» Proqramı vasitəsilə qəbul edilməsi haqqında məruzələr dinlənilmiş və mövzu ətrafında müzakirələr aparılmışdır.

Aprelin 9-da Dövlət Gömrük Komitəsində Azərbaycan və Rusiya gömrük xidməti əməkdaşlarının işgüzar görüşü keçirilmişdir. Tədbirdə Dövlət Gömrük Komitəsinin sədr müavini, gömrük xidməti general-leytenantı Əsgər Abdullayev və Rusiya Federasiyası Federal Gömrük Xidməti rəhbərinin müavini İqor Zavrajnov iştirak etmişlər.
Görüşü DGK sədrinin müavini Əsgər Abdullayev açaraq bildirmişdir ki, ötən il Moskvada Azərbaycan və Rusiya gömrük xidmətləri arasında qaçaqmalçılıq və gömrük qaydalarının pozulması ilə mübarizə sahəsində birgə tədbirlərə dair əldə olunmuş razılaşma uğurla həyata keçirilir, tərəflər sözügedən istiqamətdə qarşılıqlı səmərəli fəaliyyət göstərir. Bu sahədə informasiya mübadiləsi intensivləşmiş və bu əməkdaşlıq qaçaqmalçılıq və gömrük qaydalarının pozulması ilə mübarizə işinə öz töhfəsini verir. Davamı...